Dodong Isko | Dasay

May 2016

San Miguel, ZDS

kaniadtong nagbaktas ta

liko-liko

padung sa danaw nga naghapa

tiilan sa lungsod

wa ko pa hikaplagi ang kusog

ug pamaagi sa pag-ingon

sa daghang butang

sama niadtong akong kahago sa pag-agpas

sa kapaspas sa panon

samtang gakabuang pagplastar

pagkugos

sa musika nga daw

akong gikalingawan pagkablit

malipayon natong gikanta

ang taas nga dalan

libot sa mga bungtod

wa nato damha

di diay mahimong languyon ang kanhing

gihanduraw nga kaputli

sa tubig

apan way kaso kay kuno

wa ta miadto

alang sa atong kaugalingon

sikat kaayo ko

sa akong pamati

sa dihang ato nang naabot

ang ilang mga dunggan

ug, dayon, hinayhinay, atong giatubang pag-usab

ug gibaktas ang taas

nga dalan pauli

sa atong tagsa-tagsa ka dakbayan

nga di ko na mahinumduman

kung ato ba gihapong gikanta

hangtud sa katapusang utong

sa akong gitara nga karon

gakabuang pa gihapon ug damgo

---

Dodong Isko teaches 3Is and PR2 at a local high school in Dumalinao.

About the piece

Dasay (pictured on this site's homepage) is the name of a lake in San Miguel. This poem is the first piece in the collection Love and beyond: Poems ug mga balak which is one of the two fundraisers featured on this site. (See ad below for more details.)