Lelibeth P. Jabalde | Two poems

Bakuna: Singgit sa Kalibutan

Nag-ong-ong sa kahadlok sa katalagman ang kalibutan

Dili mahamutang ang habagang duot sa mga katawhan

Bisan asang sulok dinhi aning tibook natong kayutaan

Kakuyaw, kabalaka, kahadlok ang gibati sa kadaghanan

Sakit nga ningkuyanap karon dinhi sa tibook kalibutan

Mapa-bata, mapa-edaran man, walay gipiling takbuyan

Mga tawo dili matukib ang gibati sa matag dughan

Kay lagi wala na gayu'y kapaingnan ug arang kataguan

Daghang tawo ang nalipay kay naa na kitay bakunang panlaban

Pasa ra ningkuyanap nga sakit sa tibook kalibutan

Apan dunay ubang katawhan, ang bakunay gikahadlukan

Kay lagi daw kini "eksperimento lang nga ibutang sa atong kalawasan"

Bakuna! Singgit sa mga katawhan sa tibook yuta ning kalibutan

Bakuna maoy tamal sa tagsa-tagsa nato ka kaluwasan

Apan naay ubang mga katawhan dili pabor niining bakuna

Kay matud pa nila kining tanan sa Bibliya gikatakda na

Mapa-TV, mapa-radyo, mapa-Facebook, mapa-YouTube man

Bakuna gayod ang gikagubtan sa mga katawhan

Ang uban nanagrally sa kadalanan kay dili gustong bakunahan

Ang uban boluntaryong muadto sa mga doktor para mabakunahan

COVID-19 pandemya, pwede bang moundang ug muhawa ka na!

Nalibog na ang mga tawo ug asa sila muadto, pabakuna ba o dili ba

Naapektuhan pag-ayo ang mga trabaho sa mga tawo sa tibook pamilya

Kay kinahanglan lagi tanang katawhan bakunado bisan asang dapita

Ang uban walay hunong sa pag-ampo nga moundang na kining katalagman

Ang uban nangandoy nga mobalik na sa normal ang tanan-tanan

Ang uban nawad-an ug maayong pangandoy sa ilahang mga kabataan

Ang uban padayon nga nakigbisog ug nakigbatok para maangkon ang kaayuhan

Karon na ang panahon, igsoon, para imo na gayong timbang-timbangon

Bakuna ba ang tambal ug kaluwasan para sa imong maayong kaugmaon?

O, dili ka magpabakuna kay mahadlok ka sa resulta ug gitakda sa Bibliya?

Ikaw na ang bahalang modesisyon, igsoon, para sa imong kaugalingon

Paglaum sa Nagkaguliyang nga Kalibutan

Kaniadtong labing hamiling kalibutan

Karon nahulog na sa pagbangutan

Nag-agulo ug kalisang ang gidangatan

Hilabihang pagkapukan sa katilingban

Ang kalibutan nga labing maanyag

Sa pagkakaron kagawasan ang kanunay gitawag

Nga ang matag-usa makabaton na ug kahayag

Ug makabalik sa kinabuhing mauswag

Gisamad-samaran sa kaguol ang katawhan

Gilumsan sa pait ug kasakitan

Daghang pamilya ang nangagutman

Ug daghang sa kinabuhi ang nangakabsan

Lisod man sa kadaghanan ang nahitabo

Sa mga pamilyang naapektuhan ug nagsubo

Ug sa mga pipila ka pamilyang gaagulo

Kauban ang hinigugma sa oras lamang nga hamubo

Apan huna-hunaa nga kini sinugdanan lamang

Pagsulay lamang ang tanan sa kadaghanan

Muabot ra ang higayon sa pagsubang sa adlaw

Ug ang tanang kasakitan kalit mangahanaw

Kitang tanan dungan natong pagasugaton

Ang pagbuswak sa bag-ong kabuntagon

Nga mahimong pagtulun-an nato karon

Ang tanan magmalig-on nga puno sa paglaum

---

Lelibeth Panuncillon Jabalde teaches at Laureano Salusod NHS, Dimataling.

About these pieces

“Akong ihalad kini nga mga tula sa tanang tawo nga nagsagubang niining Pandemya. Atong lantawon ang mga positibong pamaagi para mubangon ug makasugakod sa maayong kaugmaon alang sa tibook kalibutan.”

–Note from the author