Jay-boy M. Tizon | Huna-huna nga latagaw

Diri lang usa kita mag talidhayay

Sa lugar nga ginganlan namog cute nga balay.

Nabati mo ba ang dahunog sa sapa nga gamay?

Nabati mo ba ang huni sa langgam nga ang ikog murag paypay?

Pamatia unya ang lagapak sa mga tsenilas

Inubanan sa kasikas sa tubig sa gawas

Ug sa mabugnawng huyohoy sa hangin

nga midapat sa imong bukton ug aping.

Matag pulong adunay igong ikahonghong

Diha sa imong dunggan ug sa kasing-kasing mitapion

Matag kasikas adunay igong hiyas,

Diha sa imong alimpatakan nga di makaikyas.

Namalandong samtang ang suga napalong,

Sa kalit lang mihunong ug walay na gyuy igong ikasugilon.

Nag-anam nag kahanaw ang kanhing hunahuna nga latagaw,

Mipiyong, milakaw, nga daw susama sa mipanaw.

---

Jay-Boy M. Tizon is an English instructor at the only state college in the province of Zamboanga del Sur.